Est 4 | ZomZIV | STEP | A kihihsa thu Mordecai in a theih ciangin a puan balkek-a vut khusa in khuapi sungah taikhia-in, nasiatakin nakpipi-in a kap hi.

Esther 4

Esther Huhna Mordecai in Ngen

1 A kihihsa thu Mordecai in a theih ciangin a puan balkek-a vut khusa in khuapi sungah taikhia-in, nasiatakin nakpipi-in a kap hi. 2 Ahi hangin kumpipa kongpi ciangdong bek a pai hi. Bang hang hiam cih leh puan hampi silhsa in kuamah a sungah kilutsak lo hi. 3 Kumpipa thupiakna lai a tunna gam peuhpeuh ah Jew-te lakah nakpi-a thumna le an tanga kahna le tauna a om hi. Mi tampi in puanhampi silhin vut a khu uh hi. ^a

4 Esther nasem numeite le cilgehte in Mordecai thu a gen uh ciangin amah zong a lungzing mahmah hi. Puan hampi tangin a silh ding puan a khak hangin a sang nuam kei hi. 5 Tua ciangin Esther in amah a cing dingin a kiseh cilgehpa Hathach sama, Mordekai lungdonna le ahang a thei dingin a sawl hi.

6 Tua ciangin kumpipa kongpi mai tual-awnga om Mordecai kiangah, Hathach a pai hi. 7 Mordecai in ama tunga thupiang khempeuh, Jew-te suksiat nadinga Haman in kumpipa sumkholna sunga a piak dinga a ciam sum phazah nangawn a gen hi. 8 Amaute kibeimangsak nadingin Susa pana kihawmkhia laidal khat Esther a lah dingin amah pia-a, a thu teng teltaka a gen ding le kumpipa kiangah amah na pai-a, amah le a mipihte adingin lainatna a nget ding a sawlna a gensak hi. ^b

9 Hathach kilehkik a, Mordecai gensa teng Esther tungah a zasak hi. 10 Tua ciangin amah in Mordecai tungah a gen ding amah hilh a, 11 “Kumpipa nasemte khempeuh le kumpi-gam sunga mite kuama sap lohin kumpi huang sungah a va pai leh: kumpipa in upadi khat nei a, tua banga a va paite thah ding ahi hi. A tangkai diaka kumpipa in a kham ciangkhut ama lamah a na khak leh amah a kithat kei ding hi, cih thu a theihsa uh ahi hi. Ahi hangin kei hong kisap loh ni sawmthum pha ta hi,” a ci hi. ^c

12 Esther kammalte Mordecai tungah a kizaksak ciangin, 13 “Kumpi inn sungah na om hangin Jew-te lakah nang guak a suakta tuan dingin kingaihsun kei in. 14 Ahang in, hih huna bangmah hih lo-a na daihcip leh Jew-te suahtak nading munkhat panin hong om veve dinga ahi hangin nang le na pate innkuan na kisia ding uh hi. Hih kumpi inn sung na tunna zong hih bang huna kimang dingin a tung na hihmeel kua-in thei ahi hiam,” ci-in a dawn kikna a khak hi.

15 Tua ciangin Esther in: 16 “Pai inla, Susa sunga om Jew-te khempeuh kaikhawmin kei adingin an na tang un. Sun taleh zan taleh ni thum sung an ne tui dawn na om kei un. No mah bangin kei le ka nasem numeite in zong ka na tang ding uh hi. Hih banga i hih khit ciangin upadi tawh a kituak kei kha zongin ka sih le ka sih kumpipa kiangah ka va pai ding hi,” ci-in a thuk kikna Mordecai a khak hi. ^d

17 Tua ciangin Mordecai in Esther lahsa teng khempeuh kengin a kuankhia hi.